5 декабрь, Дүшәмбе

13 сентябрь 2013 йыл, 15:38

Башҡортостанда 2013 йылдың иң яҡшы урман ҡырҡыусыһы билдәләнәсәк

автор: Галина Бахшиева

Әбйәлил районында 17 сентябрҙә Башҡортостандың иң яҡшы урман ҡырҡыусыһы исеменә республика смотр-конкурсы үтә.

– Республика урман ҡырҡыусылары конкурсын 2008 йылдан башлап алтынсы тапҡыр үткәрәбеҙ, — тип хәбәр итте «Башинформ» агентлығына БР Урман хужалығы министрлығының Милек, техник үҫеш һәм хеҙмәтте һаҡлау идаралығының бүлек начальнигы урынбаҫары Альберт Бохаров. – Был өлкәләге яңы технологиялар менән таныштырыу, тәжрибә уртаҡлашыу, производствола имгәнеүҙәр һанын кәметеү бәйгенең төп маҡсаттары булып тора.

Йола буйынса, республика бәйгеһе алдынан төбәктә зона ярыштары үткәрелде, уларҙа Урман хужалығы министрлығы ҡарамағындағы 25 дәүләт унитар предприятие ҡатнашты. Ярыштар һөҙөмтәләре буйынса һигеҙ команда финалға сыҡты. Һәр береһендә икешәр ҡатнашыусы – урман ҡырҡыусы һәм уның ярҙамсыһы.

2013 йылдың иң яҡшы урман ҡырҡыусыһы исеме өсөн «Ҡариҙел урманы», «Тәтешле урманы», «Нуриман урманы», «Илеш урманы», «Бәләбәй урманы», «Бөрйән урманы», «Ишембай урманы» һәм «Ейәнсура урманы» дәүләт унитар предприятиелары вәкилдәре көс һынашасаҡ.