8 декабрь, Кесе йома

06 сентябрь 2013 йыл, 10:03

Республикала «Минең яратҡан уҡытыусым» конкурсы иғлан ителде

автор: Эльмира Сабирова

Башҡортостанда «Минең яратҡан уҡытыусым» конкурсы старт алды. Бәйгене ойоштороусылар булып БР Мәғариф министрлығы, республиканың алдынғы баҫмалары, М.Аҡмулла исемендәге Башҡорт дәүләт педагогия университеты һәм Башҡортостандың мәғлүмәт-мәғариф порталы сығыш яһай.

БДПУ-ның матбуғат үҙәгенән хәбәр итеүҙәренсә, конкурсҡа тәҡдим ителгән эштә уҡытыусының фотоһүрәте һәм уның турала инша, хикәйә йәки шиғыр булырға тейеш. Бәйгелә ҡатнашыу өсөн «Эдвис» уҡытыу-методика үҙәге сайтында теркәлергә һәм ижади эште «Галерея» бүлегендә («Минең яратҡан уҡытыусым» фотоальбомында) урынлаштырырға кәрәк.

Еңеүселәр түбәндәге номинациялар буйынса билдәләнәсәк: «Минең беренсе уҡытыусым», «Йөҙөндә — ихлас йылмайыу», «Үҙенсәлекле ҡараш» (иң оригиналь фотоһүрәт), «Бер тулҡында» (уҡытыусы һәм уҡыусы), «Танылыу» (төрлө уҡыусылар тарафынан ебәрелгән уҡытыусы фотоһүрәте), «Мәктәптә һәм өйҙә яратҡан уҡытыусы», «Булмышы — тәрбиәсе».

Бәйгелә мәктәп уҡыусылары, уларҙың ата-әсәләре, уҡытыусылар һәм студенттар ҡатнаша ала. Конкурс 1 октябргә тиклем дауам итәсәк. Тәҡдим ителгән эштәргә махсус комиссия баһа бирә. 1-5 октябрҙә бәйгегә йомғаҡ яһау планлаштырыла. Еңеүселәрҙе наградлау тантанаһы Уҡытыусылар көнөнә ҡарата үткәреләсәк.

Тулыраҡ мәғлүмәт конкурс сайтында урынлаштырылған.