10 декабрь, Шәмбе

05 сентябрь 2013 йыл, 17:04

2016 йылға Башҡортостанда балалар баҡсаларына сираттар мәсьәләһе тулыһынса хәл ителәсәк

автор: Эльмира Сабирова

Башҡортостанда саралар комплексы — «юл картаһы» әҙерләнгән. Уға ярашлы 2016 йылға тиклем мәктәпкәсә белем биреү учреждениеларына сираттарҙы тулыһынса бөтөрөү планлаштырыла.

Республиканың мәғариф министры Әлфис Ғаязов билдәләүенсә, төбәктә был мәсьәлә эҙмә-эҙлекле хәл ителә: былтыр 14 мең урын булдырылған. Уларҙың 4071-е — балалар баҡсалары төҙөү иҫәбенә, ҡалғандары альтернатив формалар ярҙамында булдырылған. Был эш артабан да дауам итәсәк. Шулай итеп, 2014 йылда Башҡортостанда балалар баҡсаларында 11 мең яңы урын булдырыу планлаштырыла.

— Заманса мәктәпкәсә белем биреү учреждениелары төҙөүгә төбәктә йыл һайын 4 миллион һумға яҡын аҡса тотонола, — тине Әлфис Ғаязов. – Республика средстволарынан тыш, был мәсьәләне хәл итеүгә федераль субсидиялар ҙа йүнәлтелә. Атап әйткәндә, быйыл 1,7 миллиард һумдан ашыу аҡса алдыҡ (Рәсәй буйынса был дүртенсе күрһәткес), был сумма шулай уҡ балалар баҡсаларында урындар дефициты мәсьәләһен хәл итеүгә йүнәлтеләсәк.