3 декабрь, Шәмбе

26 август 2013 йыл, 11:49

Республика Президенты Учалыла балалар баҡсаһы төҙөү сифатын тәнҡиткә алды

автор: Арина Рәхимҡолова

Башҡортостан Президенты Учалыға эш сәфәре барышында 220 урынға иҫәпләнгән балалар баҡсаһын төҙөү барышын баһаланы.

Подрядсы – Сибайҙың «Строймеханизация» яуаплылығы сикләнгән йәмғиәте – бинаны бер йыл элек төҙөй башлаған. Объекттың смета буйынса хаҡы 140 миллион һум тәшкил итә. Балалар баҡсаһы ағымдағы йылдың июлендә файҙаланыуға тапшырылырға тейеш ине, әммә төҙөлөш эштәре оҙаҡҡа һуҙылған.

Рөстәм Хәмитов төҙөлөш технологияһын үтәмәгән өсөн төҙөүселәрҙең эшмәкәрлеген ҡаты тәнҡиткә алды. Диуарҙар төҙөлгәндән һуң, ҡыйыҡ ябыр урынға, улар эске төҙөлөш эштәрен башлаған. Бер нисә көн ямғыр яуғандан һуң, ҡыйыҡһыҙ торған бинаны һыу баҫҡан. Республика Президенты бындай эштән ҡәнәғәт булмауын белдерҙе һәм төҙөүселәргә барлыҡ етешһеҙлектәрҙе бөтөрөргә, көҙ аҙағына балалар баҡсаһын файҙаланыуға тапшырырға ҡушты.