8 декабрь, Кесе йома

07 август 2013 йыл, 16:14

Баш ҡаланың Беренсе йәмиғ мәсете эргәһендә фонтан һәм ҡунаҡхана төҙөләсәк

автор: Арина Рәхимҡолова

Башҡортостан баш ҡалаһының Беренсе йәмиғ мәсетендә яңыртыу эштәре бара. Уның колонналары һәм диуарҙары аҡ төҫкә буяла, ишек алды реконструкциялана, тип хәбәр иттеләр Өфө ҡалаһы Киров районының мәғлүмәт-аналитика бүлегенән.

Шулай уҡ мәсет биләмәһен төҙөкләндереү буйынса ҙур эштәр алып барыла. Проектҡа ярашлы, мәсет эргәһендә ултырып ял итер өсөн эскәмйәләр ҡуйыласаҡ, фонтан эшләйәсәк.

Айырым торған өс ҡатлы бинала 10-15 урынға иҫәпләнгән ҡунаҡхана урынлашасаҡ. Шулай уҡ ризыҡланыу һәм тәһәрәтләнеү бүлмәләре булдырыу ҡаралған. Ошонда уҡ мосолман әҙәбиәте һәм сувенирҙар һата торған кибет урынлашасаҡ.

Төҙөлөш менән бер нисә ойошма мәшғүл. Эштәрҙе ағымдағы йылдың сентябрь-октябрь айҙарында тамамлау планлаштырыла.