5 декабрь, Дүшәмбе

27 июнь 2013 йыл, 15:58

Рөстәм Хәмитов: «Һайлау кампаниялары бер ваҡытта ла еңел үтмәй»

автор: Ғәлиә Нәбиева

— Был һайлау кампанияһы ауыр буласаҡ, һайлау кампаниялары бер ваҡытта ла еңел үтмәй, — тине Рөстәм Хәмитов республика парламентарийҙары алдында сығыш яһап. – Сөнки йәмғиәттә барлыҡҡа килгән скептицизм, ялған, яла яғыуҙар аша үтергә тура килә. Быларҙың барыһы ла буласаҡ.

Республика етәксеһе билдәләүенсә, оппозиция үҙенең ҡарарҙарын һәм тәҡдимдәрен үткәреү өсөн власть өсөн көрәшергә тырышасаҡ.

— Быға айыҡ аҡыл менән ҡарарға кәрәк. Артыҡ эмоциялар кәрәкмәй, — тип иҫәпләй Рөстәм Хәмитов. – Йыш ҡына эмоцияларға бирелеп, көсөбөҙҙө, ыңғай потенциалыбыҙҙы юғалтабыҙ. Оппозицияға шул кәрәк тә инде – көсөбөҙҙө бөтөрөү өсөн, аңлайышһыҙ, конфликтлы ваҡиғалар булдырыу.

Башҡортостан Президенты билдәләүенсә, беҙ ошо ваҡиғалар солғанышында буласаҡбыҙ.

— Әммә бындай хәлгә тыныс, айыҡ аҡыл менән ҡарарға кәрәк, һәм, минеңсә, бындай эшмәкәрлек ыңғай һөҙөмтә бирәсәк, — тигән ышаныс белдерҙе республика башлығы.