8 декабрь, Кесе йома

13 июнь 2013 йыл, 9:38

Өфөлә «Төньяҡ» спорт комплексы асылды

автор: Дмитрий Слезин

Өфөнөң Орджоникидзе районында 26-сы олимпия резервындағы махсус балалар-үҫмерҙәр спорт мәктәбе бүлексәһенең «Төньяҡ» спорт комплексы асылды. Комплексты асыу тантанаһында Өфө хакимиәте башлығы Ирек Ялалов, төбәктең йәштәр сәйәсәте һәм спорт министры Андрей Иванюта, Орджоникидзе районы хакимиәте башлығы Мәхмүт Бикбулатов, «Берҙәм Рәсәй» партияһының Башҡортостанда физик культураны һәм спортты үҫтереү буйынса координаторы, кикбоксинг һәм хәрби оҫталыҡ буйынса ун дүрт тапҡыр донъя чемпионы Вил Ғабдуллин ҡатнашты.

Мәктәп директоры Виталий Новцев ҡунаҡтарға грек-рим көрәше, дзюдо, тхеквондо, өҫтәл теннисы, бокс, тренажер залдарын, сисенеп кейенеү һәм душ бүлмәләрен, конферен-залды күрһәтте.

— Комплекс барыһына ла оҡшаны. Залдар иркен һәм балалар үҙҙәре теләгән спорт төрөн һайлай ала, — тине Вил Ғабдуллин. – Республикала яңы спорт объекттары асыла башланы, шуға күрә йәштәр ҙә күпләп спортҡа ылыға.