9 декабрь, Йома

22 май 2013 йыл, 9:36

Башҡортостан Президенты Күгәрсен районының Исем ауылы мәктәбендә булды

автор: Арина Рәхимҡолова

Шишәмбе, 21 майҙа, Башҡортостан Президенты Рөстәм Хәмитов Күгәрсен районы буйлап эш сәфәре барышында Исем ауылы урта мәктәбенең яңыртылған бинаһын ҡараны. Йыл дауамында мәктәптә яңыртыу эштәре барҙы. Республика етәксеһе башҡарылған эшкә юғары баһа бирҙе.

– Мәктәпкә 1968 йылдан бирле ремонт үткәрелмәне, — тип һөйләне мәктәп директоры Татьяна Кузнецова. – Бүлмәләрҙә һыуыҡ ине, спорт майҙансығы мәктәп биләмәһенән алыҫта урынлашҡан ине.

Хәҙер мәктәптең үҙенең спорт залы бар, ә элекке интернат бинаһы урынында заманса туҡланыу блогы һәм башланғыс мәктәп корпусы урынлашты. Мәктәптә райондың ете ауылынан 147 бала уҡый. Дәрестәргә улар мәктәп автобусында йөрөй. Автобус өсөн гараж да төҙөлгән.

Республика етәксеһе спорт инвентарын һатып алыуҙа ла ярҙам итергә һүҙ бирҙе.

Киләһе йылда мәктәп үҙенең йөҙ йыллығын билдәләй. Татьяна Кузнецова был тантаналы сараға республика Президентын да саҡырҙы.