3 декабрь, Шәмбе

28 март 2013 йыл, 14:44

Өфө хакимиәте хеҙмәткәрҙәре һаны 100 кешегә ҡыҫҡартыласаҡ

автор: Арина Рәхимҡолова

Өфө хакимиәте хеҙмәткәрҙәре һаны 100 кешегә ҡыҫҡартыласаҡ, тип хәбәр иттеләр баш ҡала Советының матбуғат хеҙмәтенән. Бындай ҡарар ҡала Советы депутаттары менән сираттан тыш ултырышта ҡабул ителде.

Әлеге ҡарар Өфөлә муниципаль хеҙмәткәрҙәр һанын оптималләштереү буйынса саралар сиктәрендә ҡабул ителде. Депутаттар ҡарарына ярашлы, мэрияла гуманитар мәсьәләләр буйынса бүлек, шулай уҡ хәүефһеҙлек һәм мәғлүмәт һаҡлау бүлеге бөтөрөлә. Ҡулланыусылар баҙары идаралығы хеҙмәттәрҙе координациялау һәм көйләү бүлеге менән берләштерелә, сәнәғәт бүлеге сәнәғәт сәйәсәте һәм эшҡыуарлыҡ бүлегенә үҙгәртелә. Хеҙмәткәрҙәр һанын ҡыҫҡартыу ҡайһы бер башҡа бүлектәргә лә ҡағыласаҡ.

Депутаттар корпусы ҡарарына ярашлы, хакимиәт составында шулай уҡ Төҙөлөш, юлдарҙы һәм яһалма ҡоролмаларҙы ремонтлау буйынса яңы бүлек булдырыла. Был хеҙмәт Коммуналь хужалыҡ һәм төҙөкләндереү идаралығынан бүленеп сығасаҡ. Шул уҡ ваҡытта хеҙмәткәрҙәр һанын арттырыу планлаштырылмай.