5 декабрь, Дүшәмбе

07 март 2013 йыл, 13:02

Өфөлә «Һылыуҡай-2013» конкурсында еңеүсе билдәләнде

автор: Эльмира Сабирова

«Һылыуҡай-2013» республика конкурсы Гран-прийына Бөрйән районынан Әнүзә Ғиззәтуллина лайыҡ булды. 19 йәшлек ҡыҙ М.Аҡмулла исемендәге Башҡорт дәүләт педагогия университетының тарихи һәм хоҡуҡи белем биреү факультетында уҡый.

Юғары уҡыу йортон тамамлағандан һуң, Әнүзә юрист булырға теләй. Шулай уҡ конкурста еңеүсе үҙен телевидениела һынап ҡарарға уйлай.

Быйыл матурлыҡ бәйгеһе финалында Өфө, Стәрлетамаҡ, Сибай ҡалаларынан, Әбйәлил, Баймаҡ, Бөрйән, Дүртөйлө, Мәсетле, Миәкә райондарынан һәм Ырымбур өлкәһенән 12 ҡыҙ ҡатнашты.

Беренсе урынға һәм вице-мисс «Һылыуҡай-2013» исеменә Башҡорт дәүләт университетының Нефтекама филиалы студенткаһы Динә Әхмәтйәсәүиева лайыҡ булды.

Финалға сыҡҡан гүзәл заттарҙың барыһы ла ҡиммәтле приздар һәм сәскәләр менән бүләкләнде. Ә еңеүсегә бәйгенең төп атрибуты – таж менән ҡуша ноутбук, биҙәүестәр комплекты, сертификаттар тапшырылды.

Конкурсты ойоштороусылар булып «Башҡортостан» телерадиокомпанияһы, БР Мәҙәниәт министрлығы, Республика халыҡ ижады үҙәге һәм «Аҙна» гәзите сығыш яһаны.