11 декабрь, Йәкшәмбе

27 декабрь 2012 йыл, 15:34

Йылайыр районында иң яҡшы Ҡыш Бабайҙарҙың презентацияһы үтте

автор: Әлим Фәйезов

Йылайыр районы үҙәгендә яҡынлашып килгән Яңы йыл байрамын билдәләүгә арналған ғәҙәти булмаған парад ойошторолдо. Сарала барлыҡ 13 ауыл биләмәһенән, муниципаль район ойошмалары һәм предприятиеларынан Ҡыш Бабайҙар һәм Ҡарһылыуҙар ҡатнашты.

Байрамда муниципаль район хакимиәте башлығы Илгиз Фәтҡулллин да булды.

Йылайыр ауылының төп майҙанында йыйылған халыҡҡа Ҡыш Бабайҙар матур-матур костюмдарын ғына түгел, ә үҙ оҫталыҡтарын да күрһәтте. Уларҙың дәртле бейеүҙәре күңелле тамашаға әйләнде. Шулай уҡ бабайҙар иҫке йылды оҙатыу һәм яңыһын ҡаршылау йолаһын да күрһәтте, барыһына ла изгелек, именлек, татыулыҡ теләне.

Был матур, сағыу сара һәр кемдең күңеленә хуш килде, тип хәбәр иттеләр район хакимиәтенең мәғлүмәт-аналитика бүлегенән.