2 декабрь, Йома

17 декабрь 2012 йыл, 16:27

Республиканың 11 ҡалаһында ҡышҡы ауыл хужалығы йәрминкәләре үтте

автор: Галина Бахшиева

Башҡортостанда үткән ял көндәрендә Яңы йыл алды ауыл хужалығы йәрминкәләрендә 330 тоннанан ашыу ит, 35 тонна ҡош ите һәм 6,7 тонна бал һатылды. Йәрминкәләр республиканың 11 ҡалаһында, шул иҫәптән Өфөлә үтте.

Мәҫәлән, Өфөлә бындай 12 йәрминкә үткәрелде. Дөйөм алғанда төбәктә ике көн эсендә – 15 һәм 16 декабрҙә – 2400-ҙән ашыу сауҙа урыны ойошторолдо, тип хәбәр иттеләр БР Ауыл хужалығы министрлығының матбуғат хеҙмәтенән.

Ауыл хужалығы йәрминкәләрендә йәмғеһе 82,8 миллион һумға продукция һатылды. Һыйыр итенең килограмы уртаса – 180-270 һум, сусҡа ите – 150-230 һум, һарыҡ ите – 190-290 һум, йылҡы ите 200-280 һум тәшкил итте.

Ҡаҙ итенең килограмы йәрминкәләрҙә 250-350 һумға, өйрәк ите – 130-300 һумға, тауыҡ ите – 65-280 һумға һатылды. Балдың килоһы 220-400 һумға тәҡдим ителде.

Иҫегеҙгә төшөрәбеҙ, ҡышҡы йәрминкәләр республикала һәр ял көнө һайын 30 декабргә тиклем үткәреләсәк.