6 декабрь, Шишәмбе

06 декабрь 2012 йыл, 10:22

Башҡортостан делегацияһы «Ладья. Ҡышҡы әкиәт 2012» күргәҙмә-йәрминкәһендә ҡатнаша

автор: Ғәлиә Нәбиева

Башҡортостан делегацияһы тәүгә «Ладья. Ҡышҡы әкиәт 2012» күргәҙмә-йәрминкәһендә ҡатнаша. Форум 5 декабрҙә Мәскәүҙең «Экспоцентр» комплексында асылды. Ул 9 декабргә тиклем дауам итәсәк.

Күргәҙмәлә «Ағиҙел» Башҡортостан художество промыслалары, «Салауат» ательеһы, Рәссамдар-ташҡа биҙәктәр төшөрөү оҫталары ижади союзынан йәмғеһе ун биш оҫта үҙ эштәрен тәҡдим итә.

Танылған оҫталарҙан тыш, йәрминкәлә Өфө лицейҙарынан йәш оҫталар ҙа ҡатнаша. Улар ағасҡа һырлап биҙәктәр төшөрөү буйынса оҫталыҡ дәрестәре күрһәтәсәк.

Мәскәүҙә үткән күргәҙмәлә илдең 59 төбәгенән һәм һигеҙ яҡын сит илдән йәмғеһе 1260 ҡатнашыусы үҙ эштәрен тәҡдим итә. Форум сиктәрендә Рәсәй гармунсылары фестивале ойоштороласаҡ. Шулай уҡ йәрминкәлә ҡатнашыусылар һәм ҡунаҡтар 1,85 метрлыҡ сәйнүктән хуш еҫле сәйҙән ауыҙ итә аласаҡ. Рәсәй оҫталары менән эшләнгән был изделиеның ауырлығы 600 килограмм самаһы.