6 декабрь, Шишәмбе

06 декабрь 2012 йыл, 9:41

Рәсәй Дәүләт Думаһында 2013 йылғы Халыҡ-ара балалар уйындарының презентацияһы үтте

автор: Дмитрий Слезин

Мәскәүҙә Рәсәй Дәүләт Думаһында VI Ҡышҡы халыҡ-ара балалар уйындарының презентацияһы үтте, тип хәбәр иттеләр Халыҡ-ара балалар уйындары дирекцияһының матбуғат хеҙмәтенән. Ярыштар 2013 йылдың 26 февраленән 3 мартына тиклем Өфөлә үтә.

— Башҡортостанда спортсылар әҙерләү кимәле һәр ваҡыт юғары булды, унда профессиональ кадрҙар эшләй һәм заманса спорт комплекстары булдырылған, — тип билдәләне Дәүләт Думаһының Физик культура, спорт һәм йәштәр эштәре буйынса комитеты рәйесе Игорь Ананских. – 2013 йылғы Халыҡ-ара балалар уйындары Өфөлә иң юғары кимәлдә үтәсәк, тип ышанам.

— Алдағы йылда Халыҡ-ара балалар уйындарын ҡабул итәсәк тыуған республикам һәм уның баш ҡалаһы Өфө менән сикһеҙ ғорурланам, — тине 13 тапҡыр Паралимпия уйындары чемпионы, РФ Дәүләт Думаһы депутаты Римма Баталова. – Мин һәм депутаттар корпусында эшләгән коллегаларым Өфөгә мотлаҡ килеп, Халыҡ-ара балалар уйындарын ойоштороуҙа ярҙам итәсәкбеҙ.

Матбуғат конференцияһы сиктәрендә 2013 йылғы Халыҡ-ара балалар уйындары дирекцияһы етәксеһе Сергей Степанов журналистарға Уйындар тарихы тураһында һөйләне, Рәсәйҙә улар тәүгә үтәсәге хаҡында әйтте.