11 декабрь, Йәкшәмбе

23 ноябрь 2012 йыл, 10:44

Октябрьскийҙа Тимур Ғабдуллин иҫтәлегенә бокс буйынса Бөтә Рәсәй турниры асылды

автор: Людмила Терновая

Октябрьский ҡалаһының Спорт һарайында Рәсәйҙең спорт мастеры Тимур Ғабдуллин иҫтәлегенә арналған «А» класындағы Бөтә Рәсәй бокс турниры асылды. Бындай статуста турнирҙы Октябрьский дүртенсе тапҡыр ҡабул итә, тип хәбәр иттеләр ҡала хакимиәтенең мәғлүмәт-аналитика бүлегенән. Бәйгелә Өфө, Ырымбур, Стәрлетамаҡ, Һамар, Пермь, Ульяновск, Димитровград ҡалаларынан, Татарстандан 48 спортсы ҡатнаша.

Тимур Ғабдуллин иҫтәлегенә тәүге турнирҙы 2003 йылда Тимурҙың атаһы – Башҡортостан Республикаһының атҡаҙанған физик культура хеҙмәткәре Нил Ғабдуллин ойоштора. 10 йәшендә спорт карьераһын башлап, Тимур Ғабдуллин күп уңыштарға өлгәшә: Башҡортостан Республикаһы беренселектәрендә, Ҡораллы Көстәр чемпионаттарында еңеүсе һәм призер була, Рәсәйҙең спорт мастеры исеменә лайыҡ була. Юғары спорт ҡаҙаныштарына өлгәшеп, үҙ белемен балаларға биреү, тәжрибә уртаҡлашыу теләге менән янған спортсы 2000 йылда Урал физик культура академияһына уҡырға инә. Тик был пландарына тормошҡа ашырға яҙмай, 2002 йылдың 23 ноябрендә Тимур Ғабдуллин беҙҙең аранан китеп барҙы.