4 декабрь, Йәкшәмбе

15 ноябрь 2012 йыл, 14:06

Мәләүез районы башҡорттары ҡоролтайы киләсәккә үҙ эшмәкәрлегенең өҫтөнлөклө йүнәлештәрен билдәләне

автор: Людмила Терновая

Мәләүез ҡалаһы һәм районы башҡорттары ҡоролтайының отчет-һайлау йыйылышы ошо көндәрҙә Мәләүездә үтте, тип хәбәр иттеләр район хакимиәтенең мәғлүмәт-аналитика бүлегенән.

Ҡоролтайҙың ағымдағы йылдағы эшмәкәрлеге хаҡында доклад менән Мәләүез районы башҡорттары ҡоролтайы Башҡарма комитеты рәйесе Юнир Аҙнағолов сығыш яһаны. Ул башҡорт халҡының мәҙәниәтен һәм традицияларын һаҡлауҙа, башҡорт телен үҫтереүҙә әлеге йәмәғәт ойошмаһының ролен билдәләне. Ҡала һәм район мәктәптәрендә туған телдәрҙе, шул иҫәптә башҡорт телен уҡытыу тураһында хакимиәттең мәғариф бүлеге начальнигы Лилиә Һөйәрғолова һөйләне.

Йыйылышта ҡатнашыусылар Мәләүез районы башҡорттары ҡоролтайы эшмәкәрлегенең өҫтөнлөклө йүнәлештәрен билдәләне. Улар иҫәбендә — матди һәм рухи тормоштоң бөтә өлкәләрендә башҡорттарҙың әүҙем ҡатнашыуы, Ҡоролтайҙың яңы уставын өйрәнеүҙе ойоштороу, йәмәғәт ойошмаһы эшендә башҡорт йәштәренең ҡатнашыуы.

Ойошма активистары Бөтә донъя башҡорттары ҡоролтайы һәм Мәләүез районы башҡорттары ҡоролтайы башҡарма комитеттарының почет грамоталары менән наградланды.