4 декабрь, Йәкшәмбе

10 сентябрь 2012 йыл, 9:45

Рөстәм Хәмитов: «Рәсәй төбәктәре инвестор өсөн үҙ-ара конкуренция алып бара»

автор: Ғәлиә Нәбиева

— Бөгөн төбәктәр инвестор өсөн үҙ-ара конкуренция алып бара, — тип һыҙыҡ өҫтөнә алды Башҡортостан Президенты Рөстәм Хәмитов, РБК мәғлүмәт агентлығында журналистарҙың һорауҙарына яуап биреп.

Башҡортостан башлығының матбуғат конференцияһы инвестор өсөн көрәштә төбәктең конкурентлыҡ өҫтөнлөктәренә арналды.

— Инвесторҙан баш тартҡан бер генә төбәк башлығы ла юҡ, — тип иҫәпләй Рөстәм Хәмитов. – Инвестор килһен өсөн, һәр кем үҙендә идеаль мөхит булдырырға тырыша.

Шул уҡ ваҡытта ҙур бизнес вәкилдәре төбәк баҙарҙарына сығыу менән бәйле булған барлыҡ хәүефтәрҙе тикшереп ҡарай. Әгәр ҙә урындағы власть эшләү өсөн уңайлы шарттар гарантиялай алмай икән, эшлекле даирәлә шик тыуа.

— Шуға күрә был йәһәттән инвесторға Федерация субъекттары менән эшләү хәйерлерәк, — тип иҫәпләй Башҡортостан Президенты. – Беренсенән, федераль властың үҙенең бурыстары бар, ә инвесторҙар менән эшләү төбәк власы бурыстарына инә. Административ кәртәләргә йоғонто яһау йәһәтенән мөмкинлектәребеҙ, хоҡуҡтарыбыҙ  ни тиклем күберәк булған һайын, шул тиклем шәберәк һәм яҡшыраҡ үҫешәсәкбеҙ.