10 декабрь, Шәмбе

12 июль 2012 йыл, 11:50

Башҡортостанда юл төҙөлөшөндә яңы технологиялар ҡулланыла

автор: Рәсүл Хәмиҙуллин

Башҡортостанда юлдар төҙөлөшөндә яңы технологиялар ҡулланыла башланы. Эксперименталь участкалар сифатында Өфө районының Таптыков ауылы һәм Борай ауылы янындағы  юлдар һайланған. «Башинформ» агентлығына БР Транспорт һәм юл хужалығы буйынса дәүләт комитеты рәйесенең беренсе урынбаҫары Рим Ғиләжетдинов хәбәр итеүенсә, был участкаларҙа тупраҡты нығытыу технологиялары ҡулланыла.

— Был Европа стандарттарына яуап биргән өр-яңы технология. Уның арҡаһында грунттың ауырлыҡты күтәреүгә һәләте арта, — тип билдәләне ул. – Тупраҡты тотороҡландырыу юлдарҙың ныҡлығына йоғонто яһай һәм ошоноң арҡаһында артабан уларҙы төҙөк хәлдә тотоуға сығымдарҙы кәметә. Был технологияны ҡулланыу практикаһының кәрәгеүе лә ихтимал, сөнки республиканың төньяғында юл төҙөлөшө материалдарына бәйле билдәле ҡыйынлыҡтар бар.

Яңы технологиялар лабораторияла һынау үткән. Бөгөнгө көндә ике юл участкаһында ла ентекле мониторинг алып барыла.

—Юлдарға яуым-төшөмдәрҙең, төрлө массалағы автомобилдәрҙең нисек йоғонто яһауын практикала асыҡларға кәрәк. Бөтөн процесс күпмелер ваҡытты аласаҡ. Ошонан һуң ғына сериялы производство мәсьәләһен хәл итергә мөмкин, — тип белдерҙе БР Транспорт һәм юл хужалығы буйынса дәүләт комитеты рәйесенең беренсе урынбаҫары.

темалар: юл хужалығы