7 декабрь, Шаршамбы

19 июнь 2012 йыл, 17:52

Башҡортостан табиптары – Рәсәйҙә иң яҡшылар иҫәбендә

автор: Эльмира Сабирова

Республиканың алты табибы XI «Йылдың иң яҡшы табибы» бөтә Рәсәй конкурсы призерҙары булды. Еңеүселәр 33 номинацияла билдәләнде.

«Иң яҡшы врач-невролог» номинацияһында Өфөнөң 5-се ҡала клиник дауаханаһы табибы Радмир Шахмәмәтов икенсе урын яуланы, тип хәбәр иттеләр БР Һаулыҡ һаҡлау министрлығынан.

Өсөнсө урынға бер юлы бер нисә табип лайыҡ булды. Улар иҫәбендә — 8-се стоматология поликлиникаһы врач-ортопеды Алла Йыһаншина («Иң яҡшы стоматолог» номинацияһы), 1-се Республика психиатрия дауаханаһы эксперты, баш табип урынбаҫары Галина Захарова («Иң яҡшы психиатр-нарколог» номинацияһы), Республика кардиология диспансерының бүлек мөдире Дмитрий Онегов («Иң яҡшы йөрәк-ҡан тамырҙары хирургы» номинацияһы) һәм Ҡыуатов исемендәге республика клиник дауаханаһынан ике вәкил – Шамил Сафин («Иң яҡшы врач-нейрохирург» номинацияһы) һәм Ирина Абдрахманова («Иң яҡшы врач-фтизиатр» номинацияһы).

«Йылдың иң яҡшы табибы» бөтә Рәсәй премияһы 2001 йылдан тапшырыла. Конкурста ҡатнашыусыларҙың эштәрен РФ субъекттарының һаулыҡ һаҡлау идараһы органдарының, шулай уҡ федераль башҡарма власть органдарының комиссиялары тикшерә, бынан һуң Мәскәүҙәге үҙәк комиссия вәкилдәре үҙ баһаһын бирә.