11 декабрь, Йәкшәмбе

08 июнь 2012 йыл, 12:46

«Өфө» аэропортындағы траптарҙың береһен ҡырағай бал ҡорттары һырып алған

автор: Любовь Колоколова

«Өфө» халыҡ-ара аэропортына бөгөн ҡырағай бал ҡорттарының күсе ултырған. Ғәҙәттән тыш хәл Өфө аэропортының перронында күҙәтелгән: пассажирҙарҙы самолетҡа үткәреүсе телескопик траптарҙың береһен ҡырағай бал ҡорттары күсе һырып алған.

Уларҙан ҡотолоу өсөн күс йыйыу ҡулайламаһы булған белгесте саҡыртырға тура килгән.

«Өфө» халыҡ-ара аэропорты» асыҡ акционерҙар йәмғиәтенең йәмәғәтселек менән бәйләнештәр һәм социаль мәсьәләләр буйынса бүлеге начальнигы Таһир Мөхәмәтшин хәбәр итеүенсә, бындай хәлде ул тәүге тапҡыр күҙәтә. Аэропорт территорияһына күсеп йөрөүсе бал ҡорттары яңылыш килеп ингәндер, күрәһең.

Билдәләп китәйек, был арала самолетҡа йүнәлгән пассажирҙар булмаған. Бал ҡорттары берәүҙе лә саҡмаған. Күс ҙур түгел: бал ҡорттарының дөйөм ауырлығы 1,5 килограмды тәшкил иткән.