4 декабрь, Йәкшәмбе

07 июнь 2012 йыл, 12:23

Өфө офтальмологтары «Көнсығыш-Көнбайыш-2012» халыҡ-ара конференцияһына әҙерләнә

автор: Розалия Вәлиева

Өфө күҙ ауырыуҙары ғилми-тикшеренеү институтының 85 йыллығына арналған офтальмология буйынса «Көнсығыш-Көнбайыш-2012» ғилми-ғәмәли конференцияһы Өфөнөң Конгресс-холында 7 һәм 8 июндә үтәсәк, тип хәбәр иттеләр ғилми учреждениела.

Конференцияла Рәсәй төбәктәренән, Германиянан, Япония, Һиндостан, Пакистандан һәм Австриянан офтальмохирургтарҙың ҡатнашыуы көтөлә. Сара сиктәрендә заманса ҡорамалдар ярҙамында алдынғы Рәсәй һәм сит ил белгестәре ҡатнашлығындағы күрһәтмә операцияларҙың трансляцияһы үткәреләсәк.

Хирургтар глаукоманы, күҙ диабетын диагностикалау һәм дауалау, офтальмологияла төрлө импланттар ҡулланыу кеүек өлкәләге көнүҙәк мәсьәләләрҙе тикшерәсәк. Профессор Ингрид Крейсик күҙ төбө патологияһы хирургияһы буйынса лекция уҡыясаҡ һәм бындай ауырыуҙарҙы дауалау буйынса тәжрибәһе менән уртаҡлашасаҡ.