3 декабрь, Шәмбе

05 июнь 2012 йыл, 14:31

11-12 июндә Өфөлә Октябрь проспекты һәм Ленин урамы ябыласаҡ

автор: Әлфиә Шәрәфетдинова

Рәсәй һәм Ҡала көндәрен билдәләү арҡаһында Өфөлә 11-12 июндә транспорт хәрәкәте үҙгәрәсәк. Баш ҡаланың ике төп магистралендә — Ленин урамы менән Октябрь проспектында ваҡытлыса сикләү индереләсәк.  

Ленин урамы ике көнгә ябыла — Вәлиди урамынан алып Киров урамына тиклем 11 июндә иртәнге 8.00-дән 12 июндә 24.00-гә тиклем транспорт йөрөмәй. Бында ҡала халҡы һәм ҡунаҡтар өсөн йәйәүлеләр зонаһы ойошторола, тип хәбәр итә Өфө хакимиәтенең матбуғат хеҙмәте.

Октябрь проспектына килгәндә иһә, 11 июндә кисен Көньяҡ тыҡрығынан Төньяҡ тыҡрығына тиклем юл ябыласаҡ: 19.00-дән 22.00-гә тиклем бында байрам сараларының генераль репетицияһы ойоштороласаҡ. 12 июндә ошо уҡ ара 11.00-дән 13.00-гә тиклем тантаналар үткән ваҡытҡа ябыласаҡ. Йәнә 22.00 — 23.00 араһында Ленин майҙанында байрам салюты бирелгәндә транспорт хәрәкәте ябылыуы ихтимал.

Өфө хакимиәте автоһәүәҫкәрҙәрҙән маршруттарын алдан билдәләүҙәрен һорай.