10 декабрь, Шәмбе

16 май 2012 йыл, 9:28

Хәйбулла районында граффити конкурсы үтте

автор: Марина Шумилова

Хәйбулла районы үҙәге Аҡъярҙа кисә Халыҡ-ара ғаилә көнөнә арналған граффити конкурсы үтте.

«Нур» йәштәр һәм үҫмерҙәр клубы менән ойошторолған бәйгелә райондың дөйөм белем биреү учреждениелары уҡыусылары ҡатнашты. Ҡыҙҙар һәм егеттәр Аҡъяр баҙарының стеналарын ғаилә ҡиммәттәренә арналған төрлө һүрәттәр менән биҙәне. Тамаша ҡылыусылар ҙа ситтә ҡалманы: улар төҫлө аҡбур менән асфальтта һүрәт төшөрҙө.

Конкурс һөҙөмтәләре буйынса Аҡъяр ауылының 2-се мәктәбе командаһы беренсе урынға сыҡты. Икенсе урынды – Татыр-Үҙәк ауылы йәштәре, өсөнсө урынды Яңы Ергән ауылы командаһы яуланы.

Аҡъярға йәм өҫтәгән был сәнғәт төрө район халҡы күңеленә хуш килде.