9 декабрь, Йома

14 май 2012 йыл, 15:03

Баш ҡалала республиканың иң «айыҡ» ауылдары иғлан ителәсәк

автор: Тимур Рәхмәтуллин

20 майҙа Өфөнөң Конгресс-холында «Айыҡ ауыл» республика конкурсының гала-концерты үтә, унда 2011 йыл һөҙөмтәләре буйынса Башҡортостандың «айыҡ» ауылдары вәкилдәре наградлана. Сараны ойоштороусылар булып республика Хөкүмәте һәм Башҡортостан юлдаш телевидениеһы ярҙамында Бөтә донъя башҡорттары ҡоролтайы Башҡарма комитеты һәм «Айыҡ Башҡортостан» төбәк йәмәғәт хәрәкәте сығыш яһай.

Тантаналы сара барышында конкурста ҡатнашыусы иң яҡшы ауыл биләмәләре, журналистар, муниципалитеттар, активистар билдәләнәсәк. Гала-концертта «Айыҡ ауыл-2012» конкурсына старт биреләсәк.

Программаны популяр башҡарыусылар – Роберт Юлдашев, Дмитрий Баринов, Ян Лира, «Арғымаҡ» һәм «Ирәндек» ансамблдәренең сығыштары биҙәйәсәк.

Сара сиктәрендә конкурсты ойоштороусылар һәм еңеүселәр менән матбуғат конференцияһы үткәрелә. Конгресс-холл фойеһында милли ризыҡтарҙан ауыҙ итеү ойошторола.

Матбуғат конференцияһы – 14 сәғәттә, тантаналы сара 15 сәғәттә башлана.