4 декабрь, Йәкшәмбе

14 май 2012 йыл, 10:12

Өфөлә Швеция Илселеге делегацияһы булды

автор: Любовь Колоколова

Башҡортостан Республикаһының Сауҙа-сәнәғәт палатаһында ошо көндәрҙә иҡтисад мәсьәләләре буйынса советник Томас Хальберг етәкселегендәге Швеция Илселеге делегацияһы менән осрашыу үтте. Осрашыу барышында Башҡортостан менән Швеция араһында сауҙа-иҡтисади хеҙмәттәшлекте үҫтереүгә бәйле мәсьәләләр ҡаралды, тип хәбәр иттеләр БР Сауҙа-сәнәғәт палатаһының матбуғат хеҙмәтенән.

Төбәктең Сауҙа-сәнәғәт палатаһы президенты Юрий Пустовгаров Палатаның һәм тотош республиканың әһәмиәтле проекттары хаҡында һөйләне, шулай уҡ бизнесты үҫтереү буйынса инвесторҙар өсөн перспективалы йүнәлештәрҙе билдәләне.

Иҫегеҙгә төшөрәбеҙ, ағымдағы йылдың көҙөндә Башҡортостан Республикаһында Швеция көндәрен үткәреү планлаштырыла. Ошоға бәйле Юрий Пустовгаров Швеция Илселеге вәкилдәренә Башҡортостандың эшлекле даирәһе вәкилдәре менән бизнес-осрашыуҙар ойоштороуға булышлыҡ итергә һүҙ бирҙе.