8 декабрь, Кесе йома

02 май 2012 йыл, 11:52

Йылытыу миҙгеле йомғаҡтары буйынса Башҡортостан Рәсәйҙең иң яҡшы ун төбәге иҫәбендә

автор: Ғәлиә Нәбиева

Башҡортостан йылытыу миҙгелен үткәреү буйынса Рәсәйҙең бөтә субъекттары араһында унынсы урын алды. 2011-2012 йылғы көҙгө-ҡышҡы миҙгелде үтеү буйынса төбәктәр рейтингыһы Рәсәй Иҡтисади үҫеш министрлығы менән әҙерләнде. Бында ҡышҡы шарттарҙа эшләүгә әҙерлек буйынса башҡарма власть органдары эшмәкәрлегенең һөҙөмтәлелеге баһаланды.

Рейтингыла беренсе урынды Мәскәү алды, икенсе баҫҡыста – Воронеж өлкәһе. Ростов өлкәһе властары өсөнсө урында килә.

Беҙҙең яҡын күршеләр араһынан: Татарстан исемлектә 13-сө урында килә, Пермь крайы – 18-се, Силәбе өлкәһе –32-се, ә Ырымбур өлкәһе ни бары 68-се урында.

Рейтинг төҙөгәндә федераль ведомство төбәктәрҙең мәғлүмәттәрҙе ваҡытында биреүен һәм уларҙың асыҡлығын иҫәпкә алған. Йәшәйеште тәьмин итеү системаларындағы аварияларҙың иҫәбе һәм уларҙы бөтөрөү срогы, яғыулыҡ запасы һәм электр менән тәьмин итеү өсөн резерв сығанаҡтар булыуына ла ҙур әһәмиәт бирелгән.