3 декабрь, Шәмбе

23 апрель 2012 йыл, 16:48

Игенселәр дым ҡаплау эштәрен тамамлай

автор: Ғәлиә Нәбиева

Башҡортостан баҫыуҙарында планлаштырылған майҙандарҙың 70 проценттан ашыуында дып ҡапланған, тип хәбәр иттеләр БР Ауыл хужалығы министрлығында. Ике көндә тырматыу эштәре тулыһынса тамамланасаҡ.

Әле башлыса сәсеү эштәре алып барыла. Бөгөнгө көндә республика аграрийҙары 122 мең гектарҙа яҙғы сәсеү үткәргән. Планға ҡарата был — алты процент.

Бер аҙнала 106 мең гектарҙа  яҙғы иген һәм ҡуҙаҡлы иген культуралары сәселгән, был — планлаштырылғандың ундан бер өлөшө. Яҙғы сәсеү буйынса Саҡмағош хеҙмәтсәндәре алдынғылыҡҡа сыҡты. Район хужалыҡтары майҙандарының 22 процентында яҙғы сәсеү үткәрелгән, ә иген сәсеү буйынса план 35 процентҡа үтәлгән.

Ҡырмыҫҡалы, Мәләүез һәм Стәрлетамаҡ райондарында сәсеү эштәре белеп ойошторолған. Был райондарҙың сәсеү агрегаттары әле планлаштырылған майҙандарҙың 10 проценттан ашыуын артта ҡалдырған.

Республикалағы бөтә райондар ҙа сәсеүгә төшкән. Яҙғы сәсеү Урал аръяғының биш районында ғына башланмаған әле.