9 декабрь, Йома

17 апрель 2012 йыл, 14:34

Республиканы иммунлаштырыу аҙналығы көтә

автор: Эльмира Сабирова

Башҡортостан быйыл да Европа иммунлаштырыу аҙналығында ҡатнашасаҡ, ул Бөтә донъя һаулыҡ һаҡлау ойошмаһының Европа бюроһы инициативаһы менән 21 — 27 апрелдә үткәрелә.

Проекттың республикалағы координаторҙары – БР Һаулыҡ һаҡлау министрлығы белгестәре һәм Роспотребнадзорҙың БР буйынса Идаралығы вәкилдәре. Был акция төбәктә етенсе тапҡыр үткәрелә һәм профилактик прививкалар, халыҡҡа вакцинациялауҙың мөһимлеге һәм хәүефһеҙлеге тураһында мәғлүмәт биреүгә йүнәлтелгән.

Европа иммунлаштырыу аҙналығы дауамында республикала прививкалар эшләтеүҙең мөһимлеге, ауырыуҙарҙы иҫкәртеү тураһында мәғлүмәт таратыу эштәре йәйелдереләсәк. Иммунопрофилактика мәсьәләләренә арналған түңәрәк өҫтәлдәр, «сәләмәтлек дәрестәре», «ҡыҙыу линиялар» ойоштороу ҙа планлаштырыла. Халыҡ, иң элек балаларын вакцинациялауҙан баш тартҡан ата-әсәләр менән эшләүгә айырым иғтибар биреләсәк.

Был аҙнала инфекцион ауырыуҙарға ҡарата прививкалар эшләнергә тейешле граждандарға әүҙем иммунлаштырыу ойоштороу ҡаралған. Прививка яһатырға тейешле кешеләр дауалау-профилактика учреждениеларына саҡырыласаҡ. Бынан тыш, прививка һалыусы бригадаларҙың айырым ауылдарға сығыуы ла көтөлә.

темалар: акциялар