6 декабрь, Шишәмбе

16 апрель 2012 йыл, 15:52

Туҡайҙың тыуған көнөндә Төркиәлә башҡорт телендә шиғырҙар яңғыраны

автор: Әлим Фәйезов | фото: Әхәт Сәлихов

Төркиәнең Конья ҡалаһында ошо көндәрҙә «Мең һулыш һәм бер тауыш» Халыҡ-ара театрҙар фестивале үтә. Башҡортостандың ТӨРКСОЙ-ҙағы вәкиле Әхәт Сәлихов хәбәр итеүенсә, сарала Төркиәлә белем алыусы Рәсәй студенттары ҡатнаша. Улар төрлө телдәрҙә Ғабдулла Туҡайҙың шиғырҙарын уҡып ишеттергән. Мармара университетындағы иҡтисад һәм идара итеү факультетының әҙерлек курсында уҡыусы Марат Богданов Туҡай шиғырҙарын башҡорт телендә уҡыған. Ул Төркиәгә Башҡортостандың Ҡырмыҫҡалы районынан уҡырға килгән. Бөйөк татар шағиры Ғабдулла Туҡайҙың тыуған көнөнә арналған байрам концертына шулай уҡ Татарстан Республикаһының рәсми делегацияһы ла килгән, уға төбәктең мәҙәниәт министры Айрат Сибәғәтуллин етәкселек итә. Концерт Түбәнге Кама дәүләт драма театры артистары менән әҙерләнгән, улар ҙа Төркиәгә «Мең һулыш һәм бер тауыш» Халыҡ-ара театрҙар фестивалендә ҡатнашыу өсөн килгән.