6 декабрь, Шишәмбе

16 апрель 2012 йыл, 11:22

Бөйөк Ватан һуғышы ветерандарының иҫтәлектәре буйынса йөҙҙән ашыу видеосюжет әҙерләнгән

автор: Тимур Рәхмәтуллин

Башҡортостанда бер төркөм йәштәр «Беҙҙең уртаҡ Еңеү» дөйөм Рәсәй проекты сиктәрендә Бөйөк Ватан һуғышы ветерандары тураһында видеороликтар серияһы төшөрә. Уның ойоштороусыһы – Йәштәр эштәре буйынса федераль агентлыҡ. Акция йәштәрҙе ватансылыҡ рухында тәрбиәләүгә, һуғышты үҙ күҙҙәре менән күргәндәрҙең күләмле видеоархивын булдырыуға, тарихты боҙоп күрһәтеүгә ҡаршы көрәшеүгә йүнәлтелгән. Егет һәм ҡыҙҙарҙың башланғысы республика Президенты Рөстәм Хәмитовта, БР Йәштәр сәйәсәте һәм спорт министрлығында, «Берҙәм Рәсәйҙең Йәш Гвардияһы» төбәк бүлексәһендә лә яҡлау тапты.

«Башинформ» агентлығына был проекттың Башҡортостандағы кураторы Александр Ивановтың хәбәр итеүенсә, Өфөнән, Стәрлетамаҡтан, Нефтекаманан, республиканың башҡа ауыл һәм ҡалаларынан үҙ теләге менән был акцияға ҡушылған ике меңләгән йәш кеше ветерандарға йөрөп, улар менән интервью үткәрә һәм иҫтәлектәрен видеокамераға яҙҙырып ала. Артабан бөтә материалдар ҙа www.41-45.su сайтына урынлаштырыла һәм РФ Дәүләт архивына ебәрелә.

— Ваҡыт аҙ, герой-ветерандар көн дә арабыҙҙан китә, — ти Александр Иванов. – Бөйөк Еңеүҙе яулағандарҙың исеме мәңгелеккә илебеҙ тарихында ҡалһын өсөн, улар менән тиҙерәк осрашып өлгөрөргә кәрәк.

Уның әйтеүенсә, киң мәғлүмәт сараларында бик йыш тарихи факттар боҙоп күрһәтелә. Улай ғына ла түгел, ҡайһы бер илдәрҙә ата-бабаларыбыҙҙың батырлыҡтары онотолоуға дусар ителә, ә фашизм яҡлылар батырҙар итеп күрһәтелә. Мәҫәлән, Грузияла Михаил Саакашвили бойороғо менән «Дан мемориалы» емертелде, Украинала Степан Бандераға Герой исеме бирелде, Балтика илдәрен азат иткән совет яугирҙары илбаҫарҙар тип иғлан ителде. Ошо уҡ ваҡытта фашистар яғында һуғышҡан ветерандарға һәр төрлө хөрмәт күрһәтелә.

— Бер нисә йылдан балаларыбыҙ һуғыш йылдары тарихын китаптарҙан ғына өйрәнә аласаҡ, — ти Александр Иванов. – Видеоархив иһә беҙҙән бөтөнләйгә киткән быуындың иҫтәлектәрен – уларҙың хис-тойғоларын, һыҙланыуҙарын, ҡайғыларын, оҙаҡ көтөлгән Еңеү шатлығын тарих өсөн һаҡлап ҡалырға мөмкинлек бирәсәк.  

2011 йылдың февраленән алып Башҡортостанда йәшәгән ветерандар тураһында йөҙҙән ашыу сюжет төшөрөлгән. 2012 йылдың 9 майына волонтерҙар уларҙың иҫәбен 150-гә еткерергә иҫәп тота.