9 декабрь, Йома

05 апрель 2012 йыл, 17:41

Йылайыр районында атайҙар мираҫына ҙур хөрмәт менән ҡарайҙар

автор: Әлим Фәйезов

Йылайыр районында ауыл биләмәләре араһында «Атайҙар мираҫы» фестиваль-конкурсы үткәрелә, ул Рәсәй Федерацияһында Рәсәй тарихы йылы һәм Башҡортостан Республикаһында Имен бала саҡ һәм ғаилә ҡиммәттәрен нығытыу йылына арнала. Район хакимиәтенең мәғлүмәт-аналитика бүлегенән хәбәр итеүҙәренсә, конкурс-фестиваль 2012 йылдың мартынан алып майға тиклем ике этапта уҙғарыла.

Беренсе этапта райондың барлыҡ ауылдарында урам йәки округтарҙың художестволы үҙешмәкәрлек коллективтарының сығыштары ойоштороласаҡ. Йылайыр ауылында конкурс ойошма, учреждение һәм предприятиеларҙың художестволы үҙешмәкәрлек коллективтары араһында үткәрелә.

Бәйге шарттары буйынса программа өс өлөштән тора. «Юҡҡа ғына хәтерләмәй Рәсәй» исемле тәүге өлөшөндә Рәсәйҙең 1812 йылдағы Ватан һуғышында еңеү темаһын сағылдырыу талап ителә. Икенсеһе «Беҙ бала саҡ иленән» тип атала, ул балалар ҡатнашлығында ижади ғаиләләрҙең сығыштарын күҙ уңында тота. Өсөнсө өлөштә иһә тема ирекле.

Программала халыҡ ижадының барлыҡ жанрҙары ла рөхсәт ителә.

Икенсе этап муниципаль мәҙәниәт бүлеге графигы буйынса райондың Мәҙәниәт йортонда үткәрелә. Һәр ауыл биләмәһе үҙенең концерт программаһын тәҡдим итәсәк, биҙәү-ҡулланма сәнғәте изделиелары күргәҙмәһе-йәрминкәһен ойошторасаҡ. Икенсе этап сиктәрендә райондың мәҙәниәт йортонда Иван-Ҡыуалат ауылы сығыш яһаған да инде.

Фестиваль 3 майға тиклем дауам итәсәк, график буйынса райондың барлыҡ 13 ауыл биләмәһе сығыш яһаясаҡ. Гала концерт район һабантуйы ваҡытында үтәсәк.