5 декабрь, Дүшәмбе

04 апрель 2012 йыл, 12:56

Учалы филармонияһы артистары Силәбе өлкәһендә сығыш яһаясаҡ

автор: Тимур Рәхмәтуллин

20 һәм 21 апрелдә Силәбе өлкәһендә Учалы филармонияһы артистарының гастроле үтәсәк. Шулай итеп, беренсе концерт – 20 апрелдә Силәбе ҡалаһының «Импульс» ял үҙәгендә, икенсеһе – 21 апрелдә Арғаяш ауылында үтәсәк. Башҡортостан Республикаһының Силәбе өлкәһендәге Даими вәкиллеге матбуғат секретары Михаил Хәбиров һүҙҙәренсә, Башҡортостан артистарының килеүе Көньяҡ Урал башҡорттарының мәҙәни тормошонда сағыу ваҡиға буласаҡ. Башҡортостан артистарын Силәбе өлкәһендә яраталар һәм юғары һөнәри оҫталыҡтары өсөн хөрмәт итәләр.

Учалы филармонияһы артистары Башҡортостанда, шулай уҡ унан ситтә лә үткәрелгән төрлө байрамдарҙа республиканың күп милләтле мәҙәниәтен лайыҡлы күрһәтә. Улар Мәскәү, Санкт-Петербург, Силәбе, Магнитогорск, Сочи һәм Өфөлә үткәрелгән башҡорт һабантуйҙарында, йыл һайын төрлө фестивалдәрҙә ҡатнаша. Учалының сәнғәт хеҙмәткәрҙәре Франция, Испания, Италия, Греция, Швеция, Израиль һәм Ҡаҙағстан сәхнәләрендә лә сығыш яһаған.