11 декабрь, Йәкшәмбе

03 апрель 2012 йыл, 10:24

Башҡортостанда ер торошона һәм ерҙе файҙаланыуға контроль көсәйтелә

автор: Рәсүл Хәмиҙуллин

Башҡортостан буйынса Росреестр идаралығы менән башҡарма власть органдары араһында республикалағы ерҙәр торошо һәм уларҙы файҙаланыу тураһындағы мәғлүмәт менән алмашыу ойоштороласаҡ. Был турала БР буйынса Росреестр идаралығында үткән ергә дәүләт мониторингын алып барыу тураһындағы положениены тормошҡа ашырыу мәсьәләләренә арналған кәңәшмәлә билдәле булды.

Унда БР Ер һәм мөлкәт мөнәсәбәттәре министрлығы, БР Урман хужалығы министрлығы, Тәбиғәттән файҙаланыу өлкәһендә күҙәтеү буйынса федераль хеҙмәттең БР буйынса идаралығы һәм башҡа ведомстволар вәкилдәре ҡатнашты.

БР буйынса Росреестр Идаралығының матбуғат хеҙмәтенән хәбәр итеүҙәренсә, кәңәшмәлә ҡатнашыусылар республикала ергә мониторинг үткәреүҙә ведомство-ара хеҙмәттәшлек эштәрен дауам итергә ҡарар иткән. Шулай уҡ эштәрҙе координациялау маҡсатында эш төркөмө ойошторорға һәм уның составы буйынса тәҡдимдәр әҙерләргә кәрәклеге билдәләнгән.