3 декабрь, Шәмбе

30 март 2012 йыл, 12:58

Башҡортостан ҡалалары Рәсәйҙең иң эре сәнәғәт үҙәктәре исемлегенә инде

автор: Алик Шакиров

Башҡортостан Республикаһының ун бер ҡалаһы – Белорет, Дүртөйлө, Благовещен, Ишембай, Нефтекама, Октябрьский, Салауат, Стәрлетамаҡ, Өфө, Учалы, Яңауыл Рәсәйҙең 250 иң эре сәнәғәт үҙәге рейтингына инде.

Ҡалалар рейтингында Өфө — 7-се, Салауат – 36-сы, Нефтекама – 71-се, Стәрлетамаҡ – 86-сы, Яңауыл – 168-се, Октябрьский – 184-се, Дүртөйлө — 199-сы, Ишембай – 200-се, Белорет – 201-се, Учалы – 213-сө, Благовещен 247-се урында тора.

250 иң эре сәнәғәт үҙәге рейтингы Рәсәй Архитекторҙар союзы менән берлектә «Урбаника» территориаль планлаштырыу институты менән баҫтырылды. Ул сәнәғәт производствоһы күләмен анализлауға, муниципаль статистика мәғлүмәттәренә, эре етештереү компанияларының отчеттарына таянып әҙерләнгән.

Рейтингта беренсе урындарҙы Мәскәү һәм Санкт-Петербург биләй. Нефть һәм газ, шулай уҡ металлургия өлкәһе үҙәктәре исемлектә айырыуса мөһим урындарҙы биләй. Ике баш ҡаланан тыш, тәүге унау иҫәбенә түбәндәге ҡалалар инде: Сорғот, Нижневартовск, Омск, Пермь, Өфө, Норильск, Силәбе, Новокузнецк.

Әлеге рейтинг Рәсәйҙең эре сәнәғәт үҙәктәренең инвестициялар йәлеп итеү ҡеүәһенә баһа биреү мөмкинлеген бирә, бөтә ил кимәлендә ҡалаларҙы үҫтереү буйынса актуаль мәсьәләләргә иғтибар йүнәлтеүгә булышлыҡ итә, тип хәбәр иттеләр Территориаль планлаштырыу институтынан.