9 декабрь, Йома

30 март 2012 йыл, 12:55

Өфөлә метробус ебәрелеүе ихтимал

автор: Евгений Рәхимҡолов

Өфөлә метробус ебәрелеүе ихтимал. Көньяҡ Америка илдәрендә популяр булған был транспорт төрө өс-биш бер-береһенә тоташтырылған автобусҡа оҡшаған. Ул башҡа транспорттан айырым, электричка йәки трамвай кеүек махсус бүленгән трасса буйлап хәрәкәт итә.

Метробусҡа урындағы властар тиҙ йөрөүсе трамвай менән бер рәттән метроға алмаш булараҡ ҡарай. Ҡалала метро төҙөлмәйәсәге аныҡ билдәле. Был турала ҡала Советы ултырышында ҡала хакимиәте башлығы Ирек Ялалов хәбәр итте.

Рәсәйҙең башҡа мегаполистарындағы метрополитен объекттарының һөҙөмтәлелеген тикшергәндән һуң, Өфө властары метро төҙөүҙән баш тартырға ҡарар иткән. Бындай анализ, Мәскәү һәм Санк-Петербургтан тыш, бөтә ҡалаларҙа ла метрополитен объекттарының бер нисә станциялы аттракцион ролен үтәүен күрһәткән.

— Улар иҡтисади яҡтан отошло түгел, бюджеттан ҙур күләмдә дотациялар талап итә, — тип билдәләне Ирек Ялалов. — Күрше ҡалаларҙың береһендә пассажирҙар өсөн метрола йөрөү 15 һум тора, ә бындай сәйәхәттең үҙҡиммәте 60 һум самаһына барып баҫа.  

Метробус йәки юғары тиҙлекле трамвай, Ирек Ялалов фекеренсә, ҡалаға күпкә арзанға төшәсәк. Ә характеристикаһы һәм транспорт проблемаһын хәл итеүҙәге һөҙөмтәлелеге буйынса ул метронан ҡалышмай.