10 декабрь, Шәмбе

19 март 2012 йыл, 16:01

1 апрелдән хеҙмәт пенсиялары 3,4 процентҡа артасаҡ

автор: Әлфиә Шәрәфетдинова

Рәсәй пенсионерҙарын 2012 йылдың 1 апреленән сираттағы индексация көтә. Хеҙмәт пенсиялары – 3,4, социаль пенсиялар 14,1 процентҡа артасаҡ. Төрлө социаль льготаларға хоҡуғы булған граждандарға айлыҡ аҡсалата түләүҙәр күләме алты процентҡа артасаҡ. Был турала Рәсәй Һаулыҡ һаҡлау һәм социаль үҫеш министрлығы коллегияһының киңәйтелгән ултырышында Премьер-министр Владимир Путин белдерҙе.

— 2012 йылдың 1 февраленән хеҙмәт пенсияларының страховка өлөшө ете процентҡа күтәрелде, ә 1 апрелдән беҙ тағы бер индексация үткәрәсәкбеҙ — 3,4 процентҡа. Дөйөм алғанда үҫеш 10 проценттан ашыуыраҡ буласаҡ, был башта, 2012 йылғы бюджетты формалаштырғанда планлаштырғандан бер аҙға күберәк, — тине РФ Хөкүмәте башлығы.

Социаль пенсия күләменә килгәндә иһә, уларҙың индексацияһын «ағымдағы йыл бюджетында килешкәндәге кеүек ҡалдырабыҙ — 14,1 процентҡа», тип билдәләне Владимир Путин.

«Башинформ»дың бығаса хәбәр итеүенсә, февралдәге индексациянан һуң ҡартлыҡ буйынса хеҙмәт пенсияһының уртаса күләме Башҡортостанда 8900 һумға етте.