7 декабрь, Шаршамбы

13 март 2012 йыл, 17:09

Өфөлә полиция өс уйын йортон япты

автор: Ольга Мортазина

Өфөлә Гагарин урамындағы, Йәштәр бульварындағы һәм «Нур» театры» йәмәғәт транспорты туҡталышындағы өс уйын йорто ябылды.

— Полиция хеҙмәткәрҙәре, үрҙә күрһәтелгән уйын йорттары бер селтәргә ҡарай, тип иҫәпләй. Элек уларҙы айырым-айырым тикшереп, ҡорамалдарына арест һалғандар. Был юлы иһә Иҡтисади хәүефһеҙлек идаралығы хеҙмәткәрҙәре бөтә уйын йорттарын да бер юлы япты, — тип хәбәр иттеләр БР буйынса Эске эштәр министрлығының матбуғат хеҙмәтендә.

Ҡомарлы уйын йорттарын ябыу барышында 110 уйын ҡорамалы тартып алынған. Полиция хеҙмәткәрҙәре тарафынан табылған материалдар экспертизаға оҙатылған, уның һөҙөмтәләре ойоштороусыларҙы енәйәт яуаплылығына тарттырырға мөмкинлек бирәсәк. Хәтерегеҙгә төшөрәйек, ғәмәлдәге ҡануниәткә ярашлы, бының өсөн бер миллион ярымдан да кәм булмаған табыш алыныуын иҫбатларға кәрәк.