8 декабрь, Кесе йома

06 март 2012 йыл, 12:05

Бәләбәйҙә 220 урынлыҡ балалар баҡсаһы төҙөлә

автор: Розалия Вәлиева

Быйыл көҙ Бәләбәйҙә бассейны булған ике ҡатлы балалар баҡсаһы сафҡа индереләсәк.

Әлеге ваҡытта Бәләбәй районында 32 мәктәпкәсә белем биреү учреждениеһы бар, уларға 4086 бала йөрөй. Бәләбәй районы хакимиәтенең мәғариф бүлеге начальнигы Наталья Лаврованың әйтеүенсә, әлеге мәлдә 893 бала балалар баҡсаһына сират көтә. Яңы мәктәпкәсә белем биреү учреждениеһы төҙөлөшө «Башҡортостан Республикаһында мәктәпкәсә белем биреү системаһын үҫтереү» айырым маҡсатлы республика программаһына ярашлы алып барыла.

Бәләбәй районы хакимиәтенең мәғлүмәт-аналитика бүлегенән хәбәр итеүҙәренсә, әле төҙөүселәр бинаның икенсе ҡатын ҡаплай, тәҙрә блоктары ҡуя, тышҡы йылылыҡ трассаһын монтажлай. 10 марттан һуң  ҡыйығын ябыу планлаштырыла. Яңы балалар баҡсаһы 2012 йылдың дүртенсе кварталында асыласаҡ, тип көтөлә.