9 декабрь, Йома

21 февраль 2012 йыл, 12:06

Башҡортостандың 42 һайлау участкаһында веб-камералар булмаясаҡ

автор: Тимур Рәхмәтуллин

Башҡортостанда булдырылған 3509 участканың ҡырҡ икәүһендә веб-камералар булмаясаҡ. Был хаҡта техник видеокүҙәтеү саралары эше менән таныштырыу барышында Башҡортостан Республикаһының Үҙәк һайлау комиссияһы рәйесе Хәйҙәр Вәлиев хәбәр итте.

— Башҡортостанда 3509 һайлау участкаһы булдырылды, — тине ул. – Тауыш биреү урындарын веб-камералар менән йыһазландырыу алдағы һайлауҙарҙа ҡулланыласаҡ яңы бер сара булып тора. Видеокүҙәтеү саралары тик 3467 участкала урынлаштырыласаҡ. 42 участкала улар булмаясаҡ.

Билдәләп үтәйек, Башҡортостан – видеокүҙәтеү системаларын урынлаштырыү буйынса Рәсәйҙә Президент һайлауҙарына әҙерлек эштәрен беренсе булып тамамлаған төбәк. Һайлауҙар барышын тапшырыу өсөн барлыҡ тиерлек элемтә каналдары әҙер.