8 декабрь, Кесе йома

07 февраль 2012 йыл, 17:23

Айыу менән йондоҙ – 2013 йылғы Ҡышҡы халыҡ-ара балалар уйындары эмблемаһы һәм талисманы

автор: Дмитрий Слезин

VI Ҡышҡы халыҡ-ара балалар уйындары эмблемаһы һәм талисманының иң яҡшы проектына конкурс аҙағына ла етте. Башҡортостандың Йәштәр сәйәсәте һәм спорт министрлығынан хәбәр итеүҙәренсә, комиссия 28 ҡатнашыусының эшен ҡараған. Йәмғеһе 94 заявка ҡабул ителгән.

Стәрлетамаҡ, Күмертау ҡалаларынан, Өфө, Мәсетле, Бөрө, Күгәрсен райондарынан ебәрелгән эштәрҙән тыш, Владивостоктан, Ханты-Манси автономиялы округынан ҡабул ителгән материалдар ҙа бәйгелә ҡатнашҡан.

Ҡыҙыу фекер алышыуҙан һуң, Башҡортостан Республикаһының атҡаҙанған рәссамы Айрат Тереғолов менән «Симай» студияһы етәксеһе Рим Забаров еңеүселәр тип танылған. Улар уртаһында ҡурай сәскәһе төшөрөлгән йондоҙҙо — эмблема итеп, һоро айыуҙы талисман итеп тәҡдим иткән.

Еңеүселәрҙе грамота һәм ҡиммәтле бүләк көтә. Ҡалған ҡатнашыусылар төбәктең Йәштәр сәйәсәте һәм спорт министрлығының рәхмәт хаттарын аласаҡ.

VI Ҡышҡы халыҡ-ара балалар уйындары эмблемаһы һәм талисманы баннерҙарҙы, сувенирҙарҙы һәм баҫма продукцияны биҙәйәсәк.