6 декабрь, Шишәмбе

13 ғинуар 2012 йыл, 11:38

«Сода» предприятиеһы мазут яғыулығынан баш тартырға ниәтләй

автор: "Башинформ"

Стәрлетамаҡтағы «Сода» предприятиеһында энергия һаҡлау һәм энергетик һөҙөмтәлелекте арттырыу буйынса даими һәм өҙлөкһөҙ эш алып барыла. Сода мейестәрен мазут яғыулығынан газға күсереү был өлкәләге төп сараларҙың береһе булды.

— Беҙ мазут яғыулығынан бөтөнләй баш тартып, сода мейестәрен заманса һәм энергияны һаҡлаусы яғыулыҡҡа – газға күсерергә ниәтләйбеҙ. Был тирә-яҡ мөхиткә кире йоғонтоно кәметергә, сифатлыраҡ продукция алырға һәм уның үҙҡиммәтен кәметергә мөмкинлек бирәсәк, — тип хәбәр итте «Сода» асыҡ акционерҙар йәмғиәтенең башҡарма директоры Сергей Лобастов.

Әлеге ваҡытта тәбиғи газ энергияның иң мөһим беренсел сығанағы булып тора.  Газ – иң отошло энергетик яғыулыҡ, ул төп продукт – кальцинацияланған сода етештереүҙәге сығымдарҙы кәметергә булышлыҡ итә.

Ағымдағы йыл аҙағына тиклем эштәр тамамланасаҡ һәм был, белгестәр фекеренсә, атмосфераға зарарлы матдәләр бүлеп сығарыуҙы йылына 5 мең тоннаға тиклем кәметергә мөмкинлек бирәсәк.