6 декабрь, Шишәмбе

26 декабрь 2011 йыл, 15:09

Хәйбулла районында 112-се Башҡорт кавалерия дивизияһының юбилейын билдәләнеләр

автор: Тимур Рәхмәтуллин

Аҡъяр ауылының мәҙәниәт йортонда 112-се Башҡорт кавалерия дивизияһының 70 йыллығына арналған фәнни-ғәмәли конференция үтте. Форумда Хәйбулла районының мәктәп уҡыусылары, тарих уҡытыусылары, И.Тасимов исемендәге Аҡъяр тау колледжы һәм 110-сы һөнәри училище студенттары, шулай уҡ Бөйөк Ватан һуғышы ветерандары ҡатнашты.

Конференцияла ҡатнашыусылар 112-се Башҡорт кавалерия дивизияһын булдырыу тарихы тураһындағы докладтар менән сығыш яһаны. Райондың тарих-крайҙы өйрәнеү музейы хеҙмәткәре Рәзилә Байғусҡарова «Хәйбуллалар 112-се Башҡорт кавалерия дивизияһы составында» темаһына тикшеренеү тәҡдим итте. Мәмбәт, Әбүбәкер, Маҡан һәм Уфимский ауылы уҡыусылары һәм уҡытыусылары яҡташ кавалеристар тураһында һөйләне.