11 декабрь, Йәкшәмбе

08 декабрь 2011 йыл, 11:35

Туғыҙ айҙа Башҡортостанда 46213 сабый тыуған

автор: Ғәлиә Нәбиева

Башҡортостанстат статистиктары халыҡтың туғыҙ айҙағы тәбиғи үҫешен анализлаған. Был арала Башҡортостанда 46213 кеше тыуған, уҙған йыл менән сағыштырғанда был 2,4 процентҡа кәмерәк. Республиканың биш ҡалаһында һәм 12 муниципаль районында тыуым артыуы теркәлгән.

Күңелһеҙ статистикаға ярашлы, йыл башынан алып 45491 кеше вафат булған. Уҙған йылға ҡарата вафат булғандар иҫәбе 35 кешегә артҡан. Төбәк халҡы башлыса ҡан әйләнеше системаһы ауырыуҙарынан үлә. Яман шеш ауырыуҙары – икенсе урында. Ҡартлыҡтан 4975 кеше үлгән. Фажиғәле осраҡтар һәм транспорт авариялары 4935 кешенең ғүмерен өҙгән.

Дөйөм алғанда республикала тыуғандар һаны вафат булғандарҙан 1,6 процентҡа күберәк. Халыҡтың тәбиғи артыуы 722 кешене тәшкил иткән.