8 декабрь, Кесе йома

10 ноябрь 2011 йыл, 17:27

Волга буйы федераль округы медиа-форумында меморандум ҡабул ителде

автор: Әлим Фәйезов

Көн элгәре Түбәнге Новгородта II Волга буйы федераль округы медиа-форумы тамамланды. Унда Рәсәй Президентының Волга буйы федераль округындағы Тулы хоҡуҡлы вәкиле Григорий Рапота, алдынғы киң мәғлүмәт саралары, йәмәғәт ойошмалары, дәүләт һәм муниципаль власть органдары вәкилдәре, эксперттар, шулай уҡ Башҡортостандың киң мәғлүмәт саралары вәкилдәре ҡатнашты.

Медиа-форумда ҡатнашыусылар конфессиональ мөнәсәбәттәр, мәҙәниәт, социаль сәйәсәт, инновациялар өлкәһендәге көнүҙәк мәсьәләләрҙе тикшерҙе. Форум эше пленар ултырыш менән тамамланды, унда меморандум ҡабул ителде.

«Волга буйы федераль округы төбәктәрендә булған төрлө сәйәси, иҡтисади, социаль һәм мәҙәни процесстар федераль һәм төбәк киң мәғлүмәт сараларында сағылыш таба. Округ медиа-форумы үҙ-ара конструктив эш итеү майҙансығы булып тора, — тип билдәләнә меморандумда. – Шулай ҙа округта йәмғиәт һәм дәүләт үҫешенең мөһим тенденцияларын сағылдырған мәғлүмәт продукттарының яңы сараларын будырыу талап ителә».

Медиа-форумда ҡатнашыусылар округ төбәктәрендә 2020 йылға тиклем Волга буйы федераль округын социаль-иҡтисади үҫтереү стратегияһын тормошҡа ашырыуҙы; шулай уҡ милли-конфессиональ мөнәсәбәттәр өлкәһендә мәғлүмәт сәйәсәтен формалаштырыу, киң мәғлүмәт сараларында йәмәғәт структураларының дәүләт власы органдары менән үҙ-ара килешеп эш итеүен сағылыдырыу кеүек үҙ-ара килешеп эш итеү йүнәлештәрен өҫтөнлөклө итеп билдәләргә кәрәк, тип иҫәпләй.

Сарала ҡатнашыусылар журналистарҙы иң яҡшы сәнғәт өлгөләрен, спорт ҡаҙаныштарын, йәмәғәт ойошмалары эшмәкәрлеген һәм йәштәр башланғыстарын киң мәғлүмәт сараларында әүҙем сағылдырырға саҡырҙы.