5 декабрь, Дүшәмбе

31 октябрь 2011 йыл, 16:01

Нәжип Асанбаевтың юбилейы Өфөлә театраль фестиваль менән билдәләнәсәк

автор: Әлфиә Әһлиуллина

7 ноябрҙә Башҡортостан Республикаһының халыҡ яҙыусыһы, драматург Нәжип Асанбаевҡа 90 йәш тула. Яҙыусының юбилейы айҡанлы 2 — 8 ноябрҙә Өфөлә матур датаға арналған театр фестивале үтәсәк. М.Ғафури исемендәге Башҡорт дәүләт драма театры сәхнәһендә юбилей кисәһе 9 ноябргә билдәләнгән.

Фестиваль афишаһы юбилярҙың төрлө йылдарҙа ижад ителгән әҫәрҙәре буйынса әҙерләнгән спектаклдәрҙән тора. «Башинформ» агентлығына ойоштороусыларҙың хәбәр итеүенсә, Өфө «Нур» татар дәүләт театрында Салауат башҡорт драма театры артистары үҙенең оҫталығын күрһәтәсәк. 2 ноябрҙә, фестивалдең тәүге көнөндә, коллектив — «Сейәле тау»ҙы, 3 ноябрҙә – «Зәйтүнгөл»дө, 4 ноябрҙә – «Ете ҡыҙ» спектаклен күрһәтәсәк.

5 ноябрҙә «Нур» театры  үҙенең сәхнәһендә «Шишмә» спектаклен ҡуя.

7 ноябрҙә М.Кәрим исемендәге Милли йәштәр театрында Туймазы татар дәүләт драма театрының спектаклен ҡарарға мөмкин. Туймазылар тамашасыларға «Рәйсә+Фәйзи»не тәҡдим итәсәк.

6 ноябрҙән фестиваль марафоны Башҡорт академия драма театрында старт ала. Был көндө академтеатр труппаһы тамашасыларға театрҙың баш режиссеры Айрат Әбүшахманов ҡуйған «Әхмәтзәки Вәлиди Туған» тарихи драмаһын тәҡдим итәсәк.  

8 ноябрҙә ошонда уҡ «Ҡыҙыл паша — Кәрим Хәкимов» пьесаһы көтөлә.