3 декабрь, Шәмбе

28 октябрь 2011 йыл, 11:33

Башҡортостанда 1,3 млн «квадрат» торлаҡ файҙаланыуға тапшырылған

автор: Галина Бахшиева

Быйылғы йылдың ғинуар-сентябрендә иң күп торлаҡ республикала Өфөлә, Нефтекамала, шулай уҡ Өфө, Бәләбәй, Туймазы, Мәләүез һәм Бөрө райондарында төҙөлгән.

— Ни бары туғыҙ айҙа республиканың муниципаль райондарында — 770 мең квадрат метр, ҡала округтарында 512,5 мең квадрат метр (дөйөм күләмдән 40 процент) торлаҡ майҙаны сафҡа индерелгән, — тип хәбәр итте иҡтисади үҫеш министры урынбаҫары Лилиә Мәзитова.

Башҡортостандың Иҡтисади үҫеш министрлығынан билдәләүҙәренсә, төбәктең 37 районында торлаҡты сафҡа индереү күләмдәре буйынса ыңғай динамика күҙәтелгән. Иң юғары үҫеш – 2,6 тапҡыр – Илеш районында теркәлгән.

Бер мең кешегә иҫәптә файҙаланыуға тапшырылған торлаҡ биналарға килгәндә иһә, әлеге ваҡытта Өфө, Иглин, Бөрө һәм Бөйән райондарында иң яҡшы һөҙөмтәләргә өлгәшкәндәр.

темалар: торлаҡ, төҙөлөш