8 декабрь, Кесе йома

19 октябрь 2011 йыл, 13:27

Ваҡлап сауҙа итеү әйләнеше буйынса Башҡортостан Рәсәйҙең тәүге ун төбәге иҫәбендә

автор: Ғәлиә Нәбиева

Быйыл туғыҙ айҙа Башҡортостанда ваҡлап сауҙа итеү әйләнеше 396,3 млрд һум тәшкил итте, тип хәбәр иттеләр Башҡортостанстатта. Тауар массаһында был былтырғы йылдың ошо уҡ осорона ҡарата 5,3 процентҡа күберәк. Ваҡлап сауҙа итеү әйләнеше буйынса республика Рәсәй Федерацияһының тәүге ун төбәге иҫәбендә ҡала.

Республиканың ҡулланыусылар баҙарындағы хәлдәрҙе статистиктар тотороҡло тип баһалай. Халыҡҡа 197 млрд һум суммаға аҙыҡ-түлек һатылған — был эсемлектәр һәм тәмәке изделиеларын иҫәпкә алғанда. Аҙыҡ-түлеккә ҡарамаған тауарҙар һатыу иһә 199,3 млрд һумға барып баҫҡан.

Белгестәр билдәләүенсә, ваҡлап сауҙа итеү әйләнеше башлыса тауарҙарҙы ойошмаларға һәм шәхси эшҡыуарҙарға һатыу иҫәбенә формалаша.

Йәйге каникулдар һәм отпускылар миҙгеле тамамланды, ошоға бәйле йәмәғәт туҡланыу хеҙмәттәренә һорау артыуы күҙәтелә. Туғыҙ ай йомғаҡтары буйынса йәмәғәт туҡланыуы әйләнеше 17,5 млрд һумға еткән (уҙған йылға ҡарата 106,6 процент).