3 декабрь, Шәмбе

12 октябрь 2011 йыл, 16:54

Башҡортостанда юл хәрәкәте хәүефһеҙлеге буйынса иң яҡшы белгес һайланасаҡ

автор: Ғәлиә Нәбиева

13 октябрҙә Өфөлә «Юл хәрәкәте хәүефһеҙлеге хеҙмәтенең иң яҡшы белгесе — 2011» республика конкурсы үтәсәк. Дүртенсе тапҡыр уҙғарылған конкурс Автомобиль транспорты хеҙмәткәрҙәре көнөнә ҡарата үткәрелә.

Конкурста ойошмалар тарафынан тәҡдим ителгән йәки бәйгелә үҙаллы сығыш яһаған юл хәрәкәте хәүефһеҙлеге хеҙмәтенең белгестәре ҡатнаша ала.

Һөнәри конкурс биш этаптан тора. Тәүҙә ҡатнашыусылар компьютерҙа тест үтергә тейеш, бынан һуң улар юл хәрәкәте хәүефһеҙлеге өлкәһендә мәсьәләләр сисәсәк. Өсөнсө этапта белгестәр транспорт сараларын ҡулланғанда һәм хеҙмәтләндергәндә хеҙмәт һаҡлау ҡағиҙәләрен боҙоу осраҡтарын асыҡлаясаҡ. Тәүге медицина ярҙамын күрһәтеү – айырым бәйге буласаҡ. Брейн-ринг стилендәге һорауҙарға яуап биреү – һуңғы һынау.

Конкурсты "Тармаҡ-ара институт" дәүләткә ҡарамаған белем биреү учреждениеһы һәм Башҡортостан Республикаһы буйынса Дәүләт автомобиль юлдарын күҙәтеү идаралығы ойоштора. Еңеүселәр дипломдар һәм приздар аласаҡ, уларға «Юл хәрәкәте хәүефһеҙлеге хеҙмәтенең иң яҡшы белгесе — 2011» исеме биреләсәк.