4 декабрь, Йәкшәмбе

22 сентябрь 2011 йыл, 16:13

Башҡортостан педагогы «Рәсәйҙең йыл уҡытыусыһы-2011» исеменә дәғүә итә

автор: Эльмира Сабирова

«Башҡортостан Республикаһының йыл уҡытыусыһы-2011» титулын яулаған Евгений Ромадов «Рәсәйҙең йыл уҡытыусыһы-2011» бөтә Рәсәй конкурсында төбәк данын яҡлаясаҡ. Был юлы Рәсәй педагогтарын Тула ҡалаһы ҡабул итә, сөнки абсолют еңеүсе исеменә былтыр Тула өлкәһенән биология һәм химия уҡытыусыһы Андрей Ғарифйәнов лайыҡ булғайны.

Ярышта 75 уҡытыусы ҡатнашасаҡ, шуларҙың 15-е – ир-егеттәр.

Хәтерегеҙгә төшөрәйек, конкурс өс турҙан тора. Беренсеһендә барлыҡ ҡатнашыусылар ҙа үҙ көсөн һынап ҡарай, икенсеһендә – лауреаттар (15 кеше), өсөнсөһөндә конкурс еңеүселәре ярыша (биш кеше).

Педагогик оҫталыҡ конкурсы смотрын асыу тантанаһы 24 сентябргә билдәләнгән, ошонда уҡ беренсе тур үтәсәк. Икенсеһе иһә Мәскәүҙә ойошторола. «Рәсәйҙең йыл уҡытыусыһы-2011» 22-се бөтә Рәсәй конкурсының абсолют еңеүсеһе 5 октябрҙә, Халыҡ-ара уҡытыусылар көнөндә, иғлан ителәсәк.

Башҡортостан вәкиле Евгений Ромадов Туймазы ҡалаһының 1-се гимназияһында тарих һәм донъя мәҙәниәтенән уҡыта. Ул Башҡортостан пединститутын (әле М.Аҡмулла исемендәге БДПУ) тамамлаған. Мәктәптә 14 йыл эшләй. Үҙе әйтеүенсә, һәр ваҡыт уҡытыусы булырға хыялланған.