10 декабрь, Шәмбе

13 сентябрь 2011 йыл, 15:38

Башҡортостанға Mitsubishi Heavy Industries компанияһы делегацияһы килә

автор: Галина Бахшиева

Шаршамбы, 14 сентябрҙә, Өфөгә эш визиты менән Японияның Mitsubishi Heavy Industries компанияһы делегация килә. Делегация составында компанияның Мәскәүҙәге төп вәкиле Бунта Миура әфәнде, Sumitomo Corporation Europe Ltd төркөмө етәксеһе Еши Ишида әфәнде бар. Бынан тыш, Өфөгә «Челябгипромез» асыҡ акционерҙар йәмғиәте вәкилдәре һәм башҡа рәсми кешеләр киләсәк.

Көндөң икенсе яртыһында Башҡортостандың Тәбиғәттән файҙаланыу һәм экология министрлығында Mitsubishi сүп-сар яғыу заводының презентацияһы үтәсәк. Заводта ҡулланылған технология газлаштырыуға һәм иретеүгә нигеҙләнгән. Әлеге ваҡытта завод Японияла ғына эшләй. Ҡаты көнкүреш ҡалдыҡтарын эшкәртеү ҡеүәте көн һайын 240 тоннаға етә. Шул уҡ мәлдә атмосфера һауаһына бик аҙ миҡдарҙа бысраҡ матдәләр сығарып ташлана, тип хәбәр иттеләр министрлыҡтың матбуғат хеҙмәтенән.

Артабан Башҡортостан Хөкүмәте Йортонда вице-премьерҙар Эрнст Исаев, Марат Мөлөков, Әнүәр Мәхмүтов һәм республика Хөкүмәте Аппараты етәксеһе Илшат Тажетдинов менән осрашыу үткәреләсәк.

Япония делегацияһының Башҡортостанға визиты 15 сентябрҙә тамамлана.